தமிழ்நாட்டில் 2026-ம் ஆண்டு கோடைகாலம் வழக்கத்திற்கு மாறாக முன்கூட்டியே தொடங்கி, தற்போது அதன் உச்சக்கட்டத்தை எட்டியுள்ளது. குறிப்பாக சென்னை, வேலூர், மதுரை, திருச்சி மற்றும் ஈரோடு ஆகிய மாவட்டங்களில் வெப்பநிலை 40°C-க்கும் அதிகமாகப் பதிவாகி வருகிறது. இந்த கடும் வெப்பத்தினால் பொதுமக்களுக்கு ஏற்படும் நீர்ச்சத்து குறைபாடு மற்றும் உடல்நலச் சிக்கல்களைத் தவிர்க்கத் தமிழ்நாடு அரசு தீவிர முன்னெச்சரிக்கை நடவடிக்கைகளை மேற்கொண்டுள்ளது.
வெப்ப அலையினால் ஏற்படும் நீர்ச்சத்து இழப்பை தடுக்க, அனைத்து அரசு மருத்துவமனைகள், மருத்துவக் கல்லூரிகள், ஆரம்ப சுகாதார நிலையங்கள் மற்றும் சென்னை மாநகராட்சி சுகாதார நிலையங்களில் ஓ.ஆர்.எஸ். (ORS) கரைசல் இலவசமாக வழங்க சுகாதாரத் துறை உத்தரவிட்டுள்ளது. பொதுமக்கள் தங்களுக்குத் தேவைப்படும்போது இந்த நிலையங்களை அணுகிப் பெற்றுக்கொள்ளலாம். போதிய அளவில் கையிருப்பு வைக்க அனைத்து மாவட்ட அதிகாரிகளுக்கும் அறிவுறுத்தப்பட்டுள்ளது.
வெப்ப அதிர்ச்சி அல்லது 'ஹீட் ஸ்ட்ரோக்' (Heat Stroke) பாதிப்புக்குள்ளாகும் நபர்களுக்குத் தகுந்த சிகிச்சை அளிக்க, அரசுப் பொது மருத்துவமனைகள் மற்றும் மாவட்ட மருத்துவமனைகளில் சிறப்பு வார்டுகள் அமைக்கப்பட்டுள்ளன. உயிரிழப்புகளைத் தவிர்க்கவும், அவசர காலச் சிகிச்சைகளை விரைந்து வழங்கவும் மாவட்ட சுகாதாரத் துறை அலுவலர்களுக்கு உத்தரவிடப்பட்டுள்ளது.
அதேநேரம், கடைகளில் பாட்டில்கள் மற்றும் கேன்களில் 'ORS' என்ற பெயரில் விற்கப்படும் பல பானங்கள் பரிந்துரைக்கப்பட்ட மருத்துவத் தரநிலைகளைப் பூர்த்தி செய்வதில்லை என்றக் குற்றச்சாட்டுகள் இருக்கின்றன. எனவே, ORS கரைசல் குறித்தும், அதன் பலன் குறித்தும், பொதுமக்கள் பின்பற்ற வேண்டியவை குறித்தும் விரிவாகப் பேசியிருக்கிறார், அவசர சிகிச்சைப் பிரிவு மருத்துவர் டாக்டர் சாய் சுரேந்தர்.
நம்மிடம் பேசிய டாக்டர், ``நமது மூளையில் உள்ள ஹைப்போதலாமஸ் (Hypothalamus) என்ற பகுதிதான் உடலின் வெப்பநிலையைச் சீராக வைக்கும் ஒரு 'தெர்மோஸ்டாட்' கருவி போலச் செயல்படுகிறது. மனித உடலின் இயல்பான வெப்பநிலை 98.4°F (37°C). நாம் கடும் வெயிலில் நீண்ட நேரம் இருக்கும்போது, உடலின் அடிப்படை வளர்சிதை மாற்ற விகிதம் (BMR) எகிறுகிறது. ஒரு கட்டத்தில், இந்த ஹைப்போதலாமஸ் தன் கட்டுப்பாட்டை இழந்து, உடல் வெப்பநிலை 104°F முதல் 106°F வரை எகிறிவிடும். உடல் வெப்பநிலை 104°F-ஐத் தாண்டும்போது உடல் உறுப்புகள் 'வெந்து' போவது போன்ற நிலைக்குத் தள்ளப்படுகின்றன. அதீத வெப்பத்தால் இதயம் திடீரெனத் துடிப்பதை நிறுத்த வாய்ப்பு அதிகம்.
ஹீட் ஸ்ட்ரோக் பாதிப்பு என்பது ஒருவருக்கு மின்சார ஷாக் அடித்தால் என்ன பாதிப்பு ஏற்படுமோ, அதே போன்ற பாதிப்பை உடலின் உட்புறச் செயல்பாடுகளில் ஏற்படுத்துகிறது. வெளியில் உடல் கருகியிருக்காது, ஆனால் உள்ளுக்குள் இருக்கும் திசுக்கள் மற்றும் உறுப்புகள் கடுமையான சேதத்தைச் சந்திக்கும்.
ஹீட் ஸ்ட்ரோக் பாதிப்புடன் ஒரு நோயாளி வரும்போது, மருத்துவர்கள் காலத்தோடு போராடுகிறார்கள். அந்த 5 முதல் 10 நிமிடங்களுக்குள் வெப்பத்தைக் குறைக்கவில்லை என்றால் உயிர் பிழைப்பது கடினம்.
அதனால் ஹீட் ஸ்டோக் பாதித்தவருக்கு ரத்தக் குழாய் வழியாகச் செலுத்தப்படும் சலைன் (Saline) திரவத்தை நேரடியாக உடலுக்குள் செலுத்தி வெப்பத்தைக் குறைக்க முயல்வார்கள். இதயம் நின்ற நிலையில் வருபவர்களுக்குச் செயற்கை சுவாசமும், CPR கொடுத்தும் உயிரை மீட்கப் போராடுவார்கள்.
ORS என்பது Oral Rehydration Salts என்பதன் சுருக்கமாகும். இது நீர், உப்பு மற்றும் சர்க்கரை கலந்த ஒரு உயிர் காக்கும் கலவை. உடலில் நீர்ச்சத்து குறையும்போது, அதனை உடனடியாக ஈடுசெய்ய இது உதவுகிறது. அதில் உள்ள ஒவ்வொரு தாதுப்பொருளும் உடலின் செயல்பாட்டைச் சீராக வைக்க ஒரு குறிப்பிட்ட பணியைச் செய்கிறது.
சோடியம்: இது உடலின் நீர்ச்சத்தைத் தக்கவைக்கும் மிக முக்கியமான காரணியாகும். வியர்வையாலோ அல்லது வயிற்றுப்போக்காலோ உடல் இழந்த நீர்ச்சத்தை மீண்டும் ரீடைன் செய்ய சோடியம் உதவுகிறது.
பொட்டாசியம்: இது எலக்ட்ரோலைட் இழப்பைத் தடுக்கிறது. குறிப்பாக, செல்களுக்கு உள்ளே இருக்கும் பொட்டாசியம் அளவு குறையாமல் பார்த்துக்கொள்வதன் மூலம், நரம்பு மற்றும் தசை செயல்பாடுகளைப் பாதுகாக்கிறது.
குளோரைடு: நமது உடலில் உள்ள திரவங்களின் சமநிலையை பராமரிக்க குளோரைடு அவசியம். இது உடலில் அமில-காரத் தன்மையைச் சீராக வைக்க உதவுகிறது.
குளுக்கோஸ்: இது உடலுக்கு உடனடி ஆற்றலை அளிப்பதோடு மட்டுமல்லாமல், சோடியமும் தண்ணீரும் குடலால் விரைவாக உறிஞ்சப்படுவதற்கும் ஒரு ஊக்கியாகச் செயல்படுகிறது.
சிட்ரேட் மற்றும் பைகார்பனேட் (Citrate & Bicarbonate): இவை உடலில் அமில அளவு அதிகரித்துவிடாமல் கட்டுப்படுத்துகின்றன. குறிப்பாகத் தீவிர நீர்ச்சத்து இழப்பின் போது ஏற்படும் 'மெட்டபாலிக் அசிடோசிஸ்' போன்ற நிலைகளைத் தவிர்க்க இவை உதவுகின்றன.
பொதுவாகத் தீவிரமான வயிற்றுப்போக்கு, வாந்தி மற்றும் காய்ச்சல் உள்ளவர்களுக்கு உடலில் இருந்து வெளியேறும் திரவத்தை ஈடுசெய்ய இது வழங்கப்படுகிறது. ஆனால், தற்போது நிலவும் அதீத வெப்ப சூழலில், ஹீட் ஸ்டோக் மற்றும் உடல் உஷ்ணத்தினால் ஏற்படும் நீர்ச்சத்து இழப்பைத் தடுக்க இது ஒரு மிகச்சிறந்த தீர்வாக பரிந்துரைக்கப்படுகிறது. உடலில் நீர்ச்சத்து முழுமையாக வற்றி, வெப்பம் கட்டுக்கடங்காமல் போகும்போது உடல் உறுப்புகள் செயலிழக்கத் தொடங்கும். இத்தகைய அவசரக் காலங்களில், ஓ.ஆர்.எஸ் கரைசல் குடிப்பதன் மூலம் ரத்த ஓட்டத்தைச் சீராக்கி, இதயம் மற்றும் மூளைக்கு ஏற்படும் பாதிப்புகளைத் தடுக்க முடியும்.
ஓ.ஆர்.எஸ் கரைசல் பொடியை ஒரு லிட்டர் குடிநீரில் கலந்து ஒரு நாள் முழுவதும் குடித்து வரலாம். ஒருமுறை தயாரித்த கரைசலை 24 மணி நேரத்திற்குள் பயன்படுத்திவிட வேண்டும். குழந்தைகளுக்கும் இந்தக் கரைசலை 1 - 2 டீஸ்பூன் அளவில் அடிக்கடி கொடுக்கலாம். சிலர் ஓ.ஆர்.எஸ் பொடியை பால், ஜூஸ், குளிர்பானங்களில் கலந்து குடிக்கிறார்கள். அப்படிக் குடிக்கக் கூடாது. அதேபோல கரைசலை சூடுபடுத்தவும் கூடாது. ஓ.ஆர்.எஸ் கரைசலை மட்டுமே முழுவதுமாக நம்பி இல்லாமல், தயிர், மோர், இளநீர், போதுமான தண்ணீர் என உடலை ஹைட்ரேட்டாக வைத்துக்கொள்வது அவசியம்.
சந்தையில் கிடைக்கும் ஓ.ஆர்.எஸ் பாக்கெட்டுகள் மீது உங்களுக்குத் தயக்கம் இருந்தாலோ அல்லது அவசரத் தேவைக்குக் கிடைக்கவில்லை என்றாலோ, நீங்களே உங்கள் வீட்டிலேயே பாதுகாப்பான முறையில் ஓ.ஆர்.எஸ் கரைசலைத் தயாரிக்க முடியும்.
1 லிட்டர் சுத்தமான குடிநீரை எடுத்துக்கொள்ளவும் (சுத்திகரிக்கப்பட்ட அல்லது காய்ச்சி ஆறவைத்த நீர் சிறந்தது). அதில் 6 டீஸ்பூன் சர்க்கரை, அரை டீஸ்பூன் உப்பைச் சேர்க்கவும். சர்க்கரையும் உப்பும் நீரில் முழுமையாகக் கரையும் வரை நன்றாகக் கலக்க வேண்டும். சர்க்கரை அல்லது உப்பு அடியில் தங்கிவிடக் கூடாது. தேவைப்பட்டால் மிக்ஸியில் ஒருமுறை அடித்துக்கூட முழுமையாகக் கரைக்கலாம். (இது ஒரு லிட்டர் நீருக்கான கரைசல்)
வீட்டில் தயாரிக்கப்படும் இந்த கரைசலில் குளுக்கோஸ், சோடியம் இருப்பதால், உடனடி நீர்ச்சத்து இழப்பை இது ஈடுகட்டும். நம்மால் நேரடியாகத் தயாரிக்கப்படுவதால் எந்தப் பயமுமின்றிப் பருகலாம். மருந்துக்கடைகளில் கிடைக்கும் பாக்கெட்டுகளில் சோடியம் மற்றும் குளுக்கோஸுடன் சேர்த்து பொட்டாசியம், குளோரைடு போன்ற கூடுதல் தாதுக்களும் சரியான விகிதத்தில் கலக்கப்பட்டிருக்கும்.
வெப்ப அலை வீசும் காலத்தில் நீர்ச்சத்து இழப்பு மட்டுமன்றி, உணவு மற்றும் சுற்றுச்சூழல் சார்ந்த வேறு சில ஆபத்துகளும் இருக்கின்றன. வெப்பம் அதிகமாக இருக்கும்போது உணவுகள் மிக விரைவாகக் கெட்டுவிடும். காலையில் சமைத்த உணவுகள் மதியத்திற்குள்ளேயே பாக்டீரியா தொற்றுக்கு உள்ளாக வாய்ப்புள்ளது. இதனால், வெளியே சாப்பிடும்போது மிகுந்த எச்சரிக்கையுடன் இருக்க வேண்டும். கெட்டுப்போன உணவுகளால் வயிற்றுப்போக்கு ஏற்படும் அபாயம் அதிகம். இத்தகைய சூழலில், உடலில் இருந்து வெளியேறும் சோடியம் மற்றும் பொட்டாசியத்தை ஈடுசெய்ய வீட்டில் தயாரித்த ORS கரைசலை உடனே எடுத்துக்கொள்ள வேண்டும்.
கோடை காலத்தில் பூமியின் உட்புறம் வெப்பம் அதிகரிப்பதால், நிலத்தடியில் வாழும் பாம்புகள் மற்றும் தேள்கள் குளிர்ச்சியைத் தேடி வெளியே வரத் தொடங்கும். கிராமப்புறங்களில் மட்டுமின்றி, சென்னையைச் சுற்றியுள்ள புறநகர் பகுதிகளிலும் (Peripheral belts) இதற்கான வாய்ப்புகள் அதிகம். எனவே, புதர் நிறைந்த பகுதிகள் மற்றும் திறந்தவெளிகளில் நடமாடும்போது மிகுந்த எச்சரிக்கை தேவை.
எனவே, காலை 10 மணி முதல் மாலை 4 மணி வரை அத்தியாவசியத் தேவையின்றி வெளியே செல்வதைத் தவிர்க்கவும். உடல் வெப்பத்தைத் தணிக்கும் வகையில் தளர்வான காட்டன் ஆடைகளை (Cotton clothes) அணியவும். வெளியே செல்ல நேர்ந்தால் சன்ஸ்கிரீன் பயன்படுத்தவும். தாகம் எடுப்பதற்கு முன்பே நீர் மற்றும் ஓ.ஆர்.எஸ் (ORS) கரைசலை அருந்தி உடலைக் குளிர்ச்சியாக வைத்துக்கொள்வது ஒன்றே உயிர் காக்கும் வழியாகும்." என்றார்.
Comments
Post a Comment