Doctor Vikatan: உப்பைத் தவிர்ப்பதுபோல உணவில் சர்க்கரையை அறவே தவிர்ப்பது சரியானதா?

Doctor Vikatan: உப்பை அறவே தவிர்க்கும் உணவுப்பழக்கத்தை இன்று பலர் பின்பற்றுகிறார்கள். ஆனால், அப்படி அறவே உப்பைத் தவிர்ப்பது ஆபத்தானது என மருத்துவர்கள் எச்சரிக்கிறார்கள். அதே போல சர்க்கரையை அறவே தவிர்க்கும் வழக்கமும் அதிகரித்து வருகிறது. இது ஆரோக்கியமானதா.... சர்க்கரையைத் தவிர்த்த ஒரே வாரத்தில் சருமம் முதல் ஒட்டுமொத்த ஆரோக்கியமும் மேம்படுவதாக செய்திகள் வருகின்றன. ஆரோக்கியமான நபர், சர்க்கரையை அறவே தவிர்க்க வேண்டுமா?

பதில் சொல்கிறார், சென்னையைச் சேர்ந்த ஊட்டச்சத்து ஆலோசகர் அம்பிகா சேகர்

அம்பிகா சேகர்

உணவில் உப்பை முழுமையாகத் தவிர்க்க முடியாது, தவிர்க்கவும் கூடாது. ஏனெனில், அது உடலில் எலக்ட்ரோலைட் சமமின்மையை (Electrolyte imbalance) உண்டாக்கிவிடும். நமது உடலில் நடக்கும் அனைத்து செயல்பாடுகளுக்கும் சோடியம் மற்றும் பொட்டாசியம் மிக முக்கியமான காரணிகளாக உள்ளன.

உடலில் சமநிலை குறையும்போது முதலில் தசைப்பிடிப்பு (Muscle cramps) ஏற்படும்; கை, கால்கள் மரத்துப்போனது போன்ற உணர்வு உண்டாகும்.
சோடியம் அளவு குறையும்போது உடல் மிகவும் சோர்வடைந்து, சுறுசுறுப்பாக இயங்க முடியாமல் போகும். எலக்ட்ரோலைட் அளவு மிக அதிகமாகக் குறைந்தால், படுக்கையிலிருந்து எழுந்திருக்கக்கூட முடியாத நிலை ஏற்படும். எனவே, ஒரு நாளைக்குக் குறைந்தபட்சம் 5 கிராம் முதல் அதிகபட்சம் 7-8 கிராம் வரை உப்பு அவசியம். ஆனால், உப்பை அளவுக்கு அதிகமாகச் சேர்க்கக் கூடாது; அது உடலில் தேவையற்ற நீர் தங்க வழிவகுக்கும்.

'காம்ப்ளக்ஸ் கார்போஹைட்ரேட்' நிறைந்த வெல்லம், பனைவெல்லம் அல்லது நாட்டுச்சர்க்கரையைப் பயன்படுத்தலாம்.

இனிப்பைப் பொறுத்தவரை, வெள்ளை சர்க்கரையைத் தவிர்ப்பது நல்லது, ஏனெனில், அது 'சிம்பிள் கார்போஹைட்ரேட்' வகையைச் சார்ந்தது. அதற்கு பதிலாக 'காம்ப்ளெக்ஸ் கார்போஹைட்ரேட்' நிறைந்த வெல்லம், பனைவெல்லம் அல்லது நாட்டுச்சர்க்கரையைப் பயன்படுத்தலாம். வெள்ளை சர்க்கரையைத் தயாரிக்கும்போது பயன்படுத்தப்படும் ரசாயனங்கள் உடலுக்குத் தீங்கானவை.

வெள்ளை சர்க்கரையைத் தவிர்ப்பது நீரிழிவு நோய் (Diabetes), புற்றுநோய் (Cancer), சரும நோய்கள் மற்றும் உடல் எடை குறைப்பிற்கு (Weight loss) மிகவும் உதவியாக இருக்கும். அந்த வகையில் சர்க்கரையைத் தவிர்ப்பது ஆரோக்கியமானதுதான்.

உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.