Doctor Vikatan: என் வயது 48. எனக்குப் பல வருடங்களாக இரவில் தினமும் பால் குடிக்கும் வழக்கம் உள்ளது. பெண்கள் தினமும் பால் குடித்தால் உடல் எடை அதிகரிக்கும் என்றும் குறிப்பிட்ட வயதுக்குப் பிறகு அதைத் தவிர்க்க வேண்டும் என்றும் ஒரு வீடியோவில் பார்த்தேன். இது உண்மையா...? பால் குடித்தால் உடல் எடை அதிகரிக்குமா?
பதில் சொல்கிறார் பெங்களூரைச் சேர்ந்த கிளினிகல் டயட்டீஷியன் மற்றும் வெல்னெஸ் நியூட்ரிஷனிஸ்ட் ஸ்ரீமதி வெங்கட்ராமன்
பெண்கள் கட்டாயம் தினமும் பால் குடிக்க வேண்டும். பாலில் அபரிமிதமான கால்சியம் சத்து உள்ளது. அது பெண்களின் உடல்நலத்துக்கு, குறிப்பாக அவர்களின் எலும்புகளின் நலத்துக்கு மிக மிக முக்கியம்.
பால் குடிப்பதால் எடை அதிகரிக்கும் என்ற பயத்தில் பல பெண்களும் அதைத் தவிர்ப்பதாகச் சொல்வதைக் கேள்விப்படுகிறோம். பால் குடிப்பதால் உடல் எடை அதிகரித்துவிடாது. ஏனெனில் 100 மில்லி பாலில் வெறும் 85 கலோரிகள் மட்டுமே இருக்கும். ஆனால், அதில் 3.2 கிராம் அளவு புரதச்சத்து இருக்கிறது. அதுவும் பெண்களின் ஆரோக்கியத்துக்கு அடிப்படையானது. எனவே, பால் குடிக்கப் பிடிக்கும் என்பவர்கள், அதில் இனிப்பு சேர்க்காமல், மஞ்சள் தூளோ அல்லது குங்குமப்பூவோ சேர்த்துக் கொதிக்கவைத்துக் குடிக்கலாம்.
சைவ உணவுக்காரர்களுக்கு புரதச்சத்து மற்றும் கால்சியம் சத்துக்கான தேர்வுகள் குறைவு. அந்தச் சத்துகளை பால் மற்றும் பால் பொருள்களான தயிர், மோர், பனீர், சீஸ் போன்றவற்றில் இருந்து பெற முடியும். அசைவ உணவுப்பழக்கம் உள்ளவர்களாக இருந்தாலுமே, தினமும் அசைவம் சாப்பிடுவோர் எண்ணிக்கை குறைவாகவே இருக்கும். அவர்களுமே பால் குடிக்கலாம். சிலருக்கு பால் குடித்தால் ஏற்றுக்கொள்ளாது. லாக்டோஸ் இன்டாலரென்ஸ் (Lactose intolerance) என்ற பிரச்னை இருக்கலாம். பால் குடித்தால் வயிற்றுப்போக்கு ஏற்படுகிறது என்பவர்கள் மட்டும் அதைத் தவிர்த்தால் போதும்.
பெண்களுக்கு எலும்புகளின் ஆரோக்கியத்துக்கு கால்சியம், பாஸ்பரஸ் சத்துகள் மிக முக்கியம். குறிப்பாக, மெனோபாஸ் காலத்தில் பெண்களுக்கு எலும்புகள் வலுவிழக்கும் ஆஸ்டியோபொரோசிஸ் பாதிப்புக்கான வாய்ப்பு மிக அதிகம். அதைத் தவிர்க்கவும் கால்சியம் சத்து முக்கியம் என்பதால் பால் குடிப்பது அவசியமாகிறது.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
Comments
Post a Comment