பற்களை ஆரோக்கியமாகப் பராமரித்தால் பற்களில் பிரச்னை வராமல் தடுக்க முடியும். அந்த வகையில், பல் ஆரோக்கியத்தை பாதிக்கும் விஷயங்கள், அதற்கான தீர்வுகள் பற்றி பேசியிருக்கிறார் சென்னையைச் தேர்ந்த பல் மருத்துவர் ஏக்தா:
பல் ஆரோக்கியத்துக்கு உணவு முறை மற்றும் வாழ்க்கை முறை இரண்டுக்கும் முக்கியப் பங்கு இருக்கிறது. அனைத்து சத்துகளும் அடங்கிய சமச்சீர் உணவாக எடுத்துக்கொள்வது உடல்நலத்துக்கு மட்டுமல்ல பற்களின் ஆரோக்கியத்துக்கும் நல்லது.
ஃபிரெஷ்ஷான காய்கறிகள், பழங்கள் அதிகமாக உணவில் சேர்த்துக்கொள்ள வேண்டும். பழங்களை ஜூஸாக இல்லாமல் அப்படியே கடித்துச் சாப்பிட வேண்டும். வாழைப்பழம், ஸ்ட்ராபெர்ரி, ஆப்பிள் போன்ற பழங்கள் இயற்கையாக பற்களை சுத்தப்படுத்தும் தன்மை (Cleansers) கொண்டவை. சில நேரங்களில் துர்நாற்றத்தையும் இவை கட்டுப்படுத்தும்.
அதேபோல பூண்டு, வெங்காயம் உள்ளிட்ட சில காய்கறிகளை பச்சையாக சாப்பிடும்போது வாய் துர்நாற்றம் வீசும். அதுபோன்ற நேரங்களில் இரவு கட்டாயம் பிரஷ் செய்ய வேண்டும்.
மறுநாள் காலையில் வாயில் துர்நாற்றம் வீசுவதை இது தடுக்கும். அளவுக்கு அதிகமாக காபி, டீ குடிக்கும்போது வயிற்றில் அசிடிட்டி ஏற்படுவதோடு பற்களில் கறையும் ஏற்படும். எனவே, காபி, டீ அளவோடு குடிக்க வேண்டும். காபி, டீ குடித்த உடன் சிறிது தண்ணீர் குடித்தால் பற்களில் கறை படிவது சிறிது தடுக்கப்படும். உணவில் தயிர், மோர் சேர்த்துக்கொள்வது நல்லது. இவற்றில் காணப்படும் நல்ல பாக்டீரியாக்கள் (Probiotics) பற்களை, வாயை சுத்தப்படுத்தும் தன்மை கொண்டவை.
சூயிங்கம்
துர்நாற்றத்துக்கு தாற்காலிக தீர்வாக சூயிங்கம் மெல்லலாம். அவையும் பற்களை, வாயை சுத்தப்படுத்தி, துர்நாற்றத்தைக் குறைக்கும். ஆனால் அதுவே பழக்கமாக மாறிவிடக்கூடாது. அளவுக்கு அதிகமாக சூயிங்கம் மெல்லும்போது தாடைப்பகுதியிலுள்ள தசைகள் சோர்வடையும். மேலும் ஈறுகளில் எரிச்சலுணர்வு ஏற்படலாம்.
சூயிங்கம்மில் காணப்படும் இனிப்பு மற்றும் சுவை போன பிறகு அது எரிச்சலூட்டும் பொருளாக மாறிவிடும். விளையாட்டு வீரர்கள் களத்தில் நிற்கும்போது சூயிங்கம் மெல்வதைப் பார்த்திருப்போம். மனப்பதற்றத்தைத் தடுப்பதற்காகவும் கவனத்தைக் குவிப்பதற்காகவும் சில வீரர்கள் அதனை மெல்வார்கள். எல்லாரும் அதைப் பின்பற்றுவது சரியான பழக்கம் அல்ல.
பற்களின் ஆரோக்கியத்துக்கு கரும்பு சாப்பிடுவது நல்லது. கரும்பைப் பற்களால் கடித்துச் சாப்பிட வேண்டும். ஜூஸாக மாற்றி சாப்பிடுவது பற்களின் ஆரோக்கியத்துக்கு பங்களிக்காது. கரும்பை அப்படியே கடித்துச் சாப்பிடுவது கடினமாக இருந்தால் சிறிய துண்டுகளாக வெட்டி அதை மென்று சாப்பிடலாம். கரும்பை அப்படியே கடித்துச் சாப்பிடும்போது முன்பற்களால் அல்லாமல் கடவாய்ப் பற்களைப் பயன்படுத்திக் கடிக்க வேண்டும்.
கார்பனேட்டட் குளிர்பானங்கள் அளவுக்கு அதிகமாகக் குடிக்கும்போது பற்களின் எனாமல் பாதிக்கப்படும். அதிலிருக்கும் அளவுக்கு அதிகமான இனிப்பு பற்களில் சொத்தையை ஏற்படுத்தும். அரிசி, சாக்லேட் உள்ளிட்ட கார்பாஹைட்ரேட் அதிகம் காணப்படும் உணவுகளும் பற்களை பாதிக்கும். அந்த உணவுகள் பற்களில் சென்று சிக்கும்போது, வாயிலிருக்கும் நுண்ணுயிரிகள் அதில் சேரும்போது ஒருவகையான ரசாயனம் உருவாகும்.
இது பற்களில் கறுப்பு நிறத்தில் சிதைவை (Decay) ஏற்படுத்தும். இது அதிகரிக்க அதிகரிக்க பற்சிதைவு அதிகரித்து பல் சொத்தையாக மாறும். கார்போஹைட்ரேட் உணவுகள் நமது அன்றாட வாழ்க்கையின் அங்கமாகிவிட்டதால் அவற்றை எடுத்துக்கொள்வதைத் தவிர்க்க முடியாது.
ஆனால் பாதிப்பைத் தவிர்ப்பதற்கு சாப்பிட்ட பிறகு வாய்க் கொப்பளித்தல், இரவு தூங்குவதற்கு முன்பு பிரஷ் செய்வது ஆகியவற்றைச் செய்ய வேண்டும். பற்களில் சிதைவோ, சொத்தையோ தென்பட்டால் அதை நாக்கு வைத்தோ, பிற பொருள்களை வைத்தோ தீண்டிக்கொண்டே இருக்கக்கூடாது. சாக்லேட், சிப்ஸ் போன்ற ஆரோக்கியமற்ற உணவுகளை அளவுக்கு அதிகமாகச் சாப்பிடக்கூடாது" என்றார்.
பற்கள் பாதுகாப்பு, சிகிச்சை, வாய் சுகாதாரம் தொடர்பான சந்தேகங்களுக்கு விடைகளையும் ஆலோசனைகளையும் அளிக்கும் Happy Teeth தொடர் ஒவ்வொரு வாரமும் சனிக்கிழமை மாலை 6 மணிக்கு வெளியாகும்.
பற்கள் பராமரிப்பு பற்றி உங்களுக்கு ஏதேனும் சந்தேகம் இருந்தால், கமென்ட்ஸில் தெரிவிக்கவும். உங்கள் கேள்விகளுக்கு பல் மருத்துவர்கள் பதில் அளிப்பார்கள்.
Comments
Post a Comment