Doctor Vikatan: தேங்காய், புளி சேர்த்த பொரியல், குழம்பு வகைகளைச் சாப்பிட்டதும் மொத்த உணவும் சில மணி நேரம் நெஞ்சுக்குழிக்குள் இருப்பதைப் போல உணர்கிறேன். காரணம் என்ன... இந்தப் பிரச்னைக்கு என்னதான் தீர்வு?
பதில் சொல்கிறார் பெங்களூரைச் சேர்ந்த கிளினிகல் டயட்டீஷியன் மற்றும் வெல்னெஸ் நியூட்ரிஷனிஸ்ட் ஸ்ரீமதி வெங்கட்ராமன்
நீங்கள் குறிப்பிட்டுள்ள அறிகுறியை வைத்துப் பார்க்கும்போது இது அசிடிட்டி எனப்படும் அமிலம் எதுக்களிக்கும் பிரச்னைபோலவே தெரிகிறது. நீண்டகாலத்துக்கு நெஞ்செரிச்சல் பிரச்னை தொடரும்நிலையில், உணவுக்குழாயில் அடைப்பு ஏற்பட வாய்ப்பு உண்டு. அதைத் தவிர்ப்பதற்கு மருத்துவர்கள் ஆன்டாசிட் மருந்துகள் கொடுப்பார்கள்.
எனவே உங்களுக்கு அசிடிட்டி பிரச்னை ரொம்பகாலமாக இருந்ததா என்பதை செக் செய்ய வேண்டும். உணவை நீங்கள் சரியாக மென்று சாப்பிட வேண்டும்.
நீங்கள் குறிப்பிட்டுள்ள குழம்பு வகைகளில் புளி இருக்கும். புளி அவசியம்தான். ஆனால் உங்களுக்கு நெஞ்செரிச்சல் பிரச்னை இருக்கும்பட்சத்தில், புளியின் அமிலத்தன்மை காரணமாக, அது நெஞ்சுப்பகுதியை அடைப்பதுபோல உணரச் செய்யலாம்.
உணவை மென்று சாப்பிட வேண்டியதன் அவசியம் பலருக்கும் தெரிவதில்லை. உணவை நன்கு வேகவைத்துச் சாப்பிட வேண்டியதும் அவசியம். தொண்டைப்பகுதியில் உணவு அடைப்பது போன்று உணரும்போது சிலர், தண்ணீர் குடித்துக் குடித்து உணவை விழுங்குவார்கள். இது தவறு.
முதலில் உங்களுக்கு அசிடிட்டி பிரச்னை இருப்பதை உறுதிசெய்ய வேண்டும். எப்படிப்பட்ட உணவுகளைச் சாப்பிடும்போது இப்படி உணர்கிறார்கள் என்பதைக் குறித்துவைத்துக்கொண்டு, மருத்துவரிடம் செல்லும்போது விளக்கமாகச் சொன்னால், மருத்துவரால் சரியான சிகிச்சையைப் பரிந்துரைக்க முடியும். தேவைப்பட்டால் எண்டாஸ்கோப்பி பரிசோதனை செய்யச் சொல்வார்கள். தேங்காய், புளி சேர்த்த உணவுகளை நிறுத்துவது மட்டும் தீர்வாகாது. பிரச்னைக்கான காரணம் அறிந்து சிகிச்சை எடுத்தால்தான் அந்த பாதிப்பு மீண்டும் வராமலிருக்கும்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
Comments
Post a Comment