Doctor Vikatan: என் வயது 54. சிறுநீர் கழிக்கும்போது எனக்கு அவ்வப்போது அது நுரைத்து வெளியேறுகிறது. இப்படி சிறுநீரில் நுரைத் தள்ளினால், அது சிறுநீரகப் பாதிப்பாக இருக்கலாம் என்கிறார்கள் சிலர். இந்தப் பிரச்னைக்கு என்ன காரணம்... நான் என்ன செய்ய வேண்டும்?
பதில் சொல்கிறார், சென்னையைச் சேர்ந்த, மூத்த சிறுநீரகவியல் மருத்துவர் என். ராகவன்
பொதுவாக சிறுநீர் கழிக்கும்போது நுரை வந்தால், பலரும் பயப்படுவார்கள். ஆனால், அப்படி நுரை வரும்போதெல்லாம் அது சிறுநீரகப் பாதிப்புதான் என்று நினைத்து பயப்படத் தேவையில்லை.
சிறுநீரில் நுரைத் தள்ள, சிறுநீரகப் பாதிப்பும் ஒரு காரணமாக இருக்கலாம். அதுமட்டுமே காரணமாகாது. உடலில் தொற்று (infection) ஏற்பட்டிருக்கலாம் அல்லது உடலில் நீர்ச்சத்து குறைந்து, தண்ணீர் குறைவாகக் குடித்திருந்தாலும்கூட சிறுநீர் நுரைத்து வெளியேறலாம்.
சிறுநீர் கழிக்கும்போது இதுபோன்று அடிக்கடி நுரை வருகிறது என்றால், நீங்கள் மருத்துவரை அணுகி கலந்தாலோசிப்பது நல்லது. மருத்துவர் தொடர்ச்சியான பரிசோதனைகளை (series of tests) செய்யப் பரிந்துரைப்பார். மிக முக்கியமாக நீரிழிவு நோய் (diabetes) இருக்கிறதா என்று பார்ப்பார்.
சர்க்கரை நோய் பாதிப்பினால் சிறுநீரில் புரதக்கசிவு (protein leak) ஏற்படுகிறதா என்பதையும் மருத்துவர் கவனிப்பார்.
முன்பெல்லாம் சிறுநீரில் புரதக்கசிவு இருந்தால், அது மிகவும் மோசமான ஒரு நிலைமை என்று நினைத்துக் கொண்டிருந்தார்கள். ஆனால், இப்போது அப்படி இல்லை. தற்போது நீரிழிவு நோயைக் கட்டுப்படுத்துவது (diabetic control) மிகவும் எளிது.
அதோடு இதற்கான சிகிச்சை முறைகளிலும் (treatment options) நிறைய முன்னேற்றங்கள் வந்துள்ளன. எனவே, சிறுநீரில் நுரை வருவதைக் கண்டு அதை மோசமான விஷயமாக நினைத்து பயப்பட வேண்டாம். அதே சமயம், அதை ஓர் எச்சரிக்கை சிக்னலாக (warning sign) மட்டும் எடுத்துக்கொண்டு, அடுத்தகட்ட நடவடிக்கைகள் என்னவெல்லாம் எடுக்க வேண்டுமோ, அவற்றைச் செய்தாலே போதுமானது.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
Comments
Post a Comment