சேப்பாக்கம் மைதானத்தில் சென்னை அணியும் கொல்கத்தா அணியும் மோதிய போட்டியில் கொல்கத்தா அணி வென்றிருந்தது. சேப்பாக்கம் மைதானத்தில் சென்னை அணி ஆடும் கடைசி லீக் போட்டி இதுதான் என்பதால் போட்டி முடிந்த பிறகு கொஞ்சம் ஸ்பெசலான விஷயங்களெல்லாம் நடந்திருந்தது.
போட்டி முடிந்த பிறகு தோனி உட்பட சிஎஸ்கே வீரர்கள் அனைவரும் மைதானத்தை சுற்றி வந்து ரசிகர்களுக்கு நன்றி கூறும் விழா முன்னதாகவே ஏற்பாடு செய்யப்பட்டிருந்தது. திட்டமிடப்பட்டதை போலவே போட்டிக்குப் பிறகான பரிசளிப்பு விழாவெல்லாம் முடிந்த பிறகு தோனி தனது வீரர்களுடன் ட்ரெஸ்ஸிங் ரூமிலிருந்து மைதானத்திற்குள் என்ட்ரி கொடுத்தார்.
இதற்கிடையில் மைதானம் முழுவதும் `எல்லோருக்கும் நன்றி', (Yellowrukkum Nandri) `மீண்டும் சந்திப்போம்' போன்ற வாசகங்கள் எழுதப்பட்ட பதாகைகளெல்லாம் வைக்கப்பட்டிருந்தது. `எங்கள் நெஞ்சில் குடியிருக்கும் ரசிகர்களுக்கு நன்றி...' போன்ற வாசகங்கள் எழுதிய பதாகைகளை சிஎஸ்கே வீரர்களே ஏந்தியும் வந்தனர்.
முட்டி வலியால் அவதியுறும் தோனி காலில் ஒரு கட்டுடன் நடந்து வந்து ரசிகர்களுக்கு நன்றி கூறினார். மேலும், ரசிகர்களுக்கு சில பரிசுப்பொருள்களையும் வழங்கினார். `Yellowrukm Thanks' என எழுதப்பட்டிருந்த மஞ்சள் டீ சர்ட் மற்றும் தோனியின் ஆட்டோகிராப் போடப்பட்ட ஒரு டென்னீஸ் பந்தையும் தோனியிடம் பரிசாக பெற்ற ரசிகர்கள் குதூகலித்து கொண்டாடினர்.
இதுபோக, `நாங்கள் அடித்த பெரிய பெரிய சிக்சர்களைவிட உங்களின் அன்பு பெரிது' என வாசகம் பொறிக்கப்பட்ட ஒரு அட்டையில் தோனி உட்பட சிஎஸ்கே வீரர்கள் அத்தனை பேரும் ஆட்டோகிராப் போட்டிருந்த ஒரு கார்டும் ரசிகர்களுக்கு வழங்கப்பட்டிருந்தது.
தோனி & கோ மைதானத்தைச் சுற்றி வந்த சமயத்தில் தொலைக்காட்சி நிகழ்ச்சிக்காக நேரலையில் பேசிக்கொண்டிருந்த கவாஸ்கரும் தோனியும் நேருக்கு நேர் சந்தித்து நலம் விசாரித்துக் கொண்டனர்.
திடீரென கவாஸ்கர் தனது சட்டையில் தோனியை ஆட்டோகிராப் போடச் சொல்ல தோனியும் மகிழ்ச்சியோடு ஆட்டோகிராப் வழங்கிவிட்டு மீண்டும் ரசிகர்களை நோக்கி நகர்ந்தார்.
`சச்சினுக்கு மும்பையில் மட்டும்தான் ரசிகர்கள் உண்டு. கோலிக்கு பெங்களூருவில் மட்டும்தான் ரசிகர்கள் உண்டு. ஆனால், தோனிக்கு இந்தியா முழுவதும் ரசிகர்கள் இருக்கிறார்கள்.' என முன்பொரு சமயத்தில் கவாஸ்கர் தோனியைப் புகழ்ந்ததுதான் இந்த சமயத்தில் ஞாபகம் வந்தது.
'மீண்டும் சந்திப்போம்' என்கிற வாசகத்தையும் மைதானம் முழுவதும் பார்க்க முடிந்தது. இது சிஎஸ்கே சொல்லும் செய்தியா? இல்லை தோனி சொல்லும் செய்தியா?
தோனி அடுத்த சீசனிலும் சேப்பாக்கத்திற்கு வீரராகவே மீண்டும் ரசிகர்களை சந்திக்க வருவாரா? உங்கள் கருத்தை கமென்ட்டில் பதிவிடுங்கள்!
Comments
Post a Comment