Doctor Vikatan: ஜிம் செல்பவர்கள் மற்றும் பாடிபில்டிங் செய்பவர்களிடையே உடலை விரைவாகக் கட்டமைக்க அனபாலிக் ஸ்டீராய்டு பயன்படுத்தும் போக்கு அதிகரித்து வருவதாக மருத்துவ எச்சரிக்கைகள் வெளியாகி வருகின்றன.
மருத்துவரின் பரிந்துரை இல்லாமல் ஜிம்மில் கொடுக்கப்படும் ஸ்டீராய்டுகளை உட்கொள்வதால், அது பிற்காலத்தில் உடல்நல பாதிப்புகளை ஏற்படுத்துமா... இயற்கை முறையில் உடலைக் கட்டுக்கோப்பாக வைக்க நினைப்பவர்களுக்கும், இந்த ஸ்டீராய்டு மாயையில் சிக்கியவர்களுக்கும் உங்களின் அறிவுரை என்ன?
பதில் சொல்கிறார், சென்னையைச் சேர்ந்த ஃபிட்னெஸ் ஆலோசகர் ஷீபா தேவராஜ்.
அனபாலிக் ஸ்டீராய்டுகளைப் பயன்படுத்துபவர்கள், அதுகுறித்த முறையான கல்வியும் அனுபவமும் உள்ள ஒரு நபரின் வழிகாட்டுதலைப் பெற்று எடுத்துக்கொள்வது நல்லது. அப்படிச் செய்யும்போது உங்களுக்கு உடல்நல பாதிப்புகள் (Health Implication) பெரிய அளவில் வராது.
ஏனெனில், அவர்கள் முதலில் உங்களை ரத்தப் பரிசோதனை (Blood Test) செய்யச் சொல்வார்கள். அந்த ரத்தப் பரிசோதனையில் முக்கியமான அளவீடுகள் (Parameters) அனைத்தையும் சரிபார்த்து, அதன் அடிப்படையில் உங்களுக்குப் பொருத்தமான ஸ்டீராய்டைப் பரிந்துரைப்பார்கள். இது ஒவ்வொரு நபருக்கும் மாறுபடும்.
பாடிபில்டிங் போட்டிகளுக்குச் செல்பவர்கள் கண்டிப்பாக இதனைப் பயன்படுத்துவார்கள். ஏனெனில், உடல் அவ்வளவு கட்டுக்கோப்பாகவும், தசைகள் தெளிவாகவும் (Ripped) தெரிய வேண்டும் என்றால், அவர்கள் இது போன்ற உணவுகளை (External Substances) எடுத்துக்கொள்வது அவர்களுக்கு அவசியமாகிறது.
பாடி பில்டர்களுக்குப் பயிற்சி அளிப்பவர்கள், அறிவியல்பூர்வமாக, இதைப் பற்றிப் படித்துவிட்டுத்தான் செய்கிறார்கள். அந்த வகையில், பாடி பில்டரின் உடலுக்குள் ஒரு அனபாலிக் ஸ்டீராய்டு சென்றாலும், பாடி பில்டிங் போட்டிகள் முடிந்த பிறகு அதனை உடலிலிருந்து வெளியேற்றும் 'ஃபிளஷிங் அவுட்' (Flushing Out) என்ற செயல்முறையையும் மேற்கொள்வார்கள்.
இதன் மூலம் உடலில் உள்ள ஸ்டீராய்டு பொருள்கள் அனைத்தும் வெளியேற்றப்படும். இந்தச் செயல்முறைக்கென்று ஒரு குறிப்பிட்ட காலம் (Time) உள்ளது. இதைப் பற்றி நன்கு தெரிந்தவர்களிடம் சென்றால், அவர்கள் சரியாக வழிநடத்துவார்கள்.
இதைப்பற்றி எதுவுமே தெரியாமல், மற்றவர்கள் ஸ்டீராய்டு எடுக்கிறார்கள், இதன் மூலம் சீக்கிரமாக எடையைக் குறைக்கிறார்கள் (Weight Loss) என்று நீங்களாகவே எடுத்தால், உடல்நல பாதிப்புகள் மிக அதிகமாக இருக்கும்.
அப்போதுதான் ஸ்டீராய்டு ஆபத்தாக மாறுகிறது. ஏனெனில், அந்த ஸ்டீராய்டை உங்கள் உடல் ஏற்றுக்கொள்ளுமா என்பதும், அதனை எந்த அளவு எடுக்க வேண்டும் என்பதும் உங்களுக்குத் தெரியாது.
உதாரணத்திற்கு, மருத்துவர் ஒரு மாத்திரையைப் பரிந்துரைக்கும் போது, நம் உடலுக்கு எவ்வளவு தேவையோ அந்த அளவைத்தான் கொடுப்பார். அப்படித்தான் ஸ்டீராய்டும். அது பற்றி எதுவுமே தெரியாமல், எல்லோரும் எடுக்கிறார்கள் என்பதற்காக நீங்களாகவே எடுத்தால், அது கண்டிப்பாக உடல்நலப் பிரச்னைகளை ஏற்படுத்தும்.
இதயப் பிரச்னைகள் (Heart Problems), சிறுநீரகப் பிரச்னைகள் (Kidney Problems) உள்ளிட்ட பலவிதமான பாதிப்புகள் ஏற்படலாம். அனபாலிக் ஸ்டீராய்டுகளைப் பற்றிப் புரிந்து கொள்ளாமல், எவ்வளவு சாப்பிட வேண்டும் என்று தெரியாமல், எடுப்பதன் மூலம் உங்கள் உடலை நீங்களே வருத்திக் கொள்கிறீர்கள்.
ஒரு நபர், பாடி பில்டிங் போட்டிக்கெல்லாம் செல்லவில்லை, உடலை மட்டும் கட்டுக்கோப்பாக (Fit) வைத்திருக்க வேண்டும் என்று நினைத்தால், அவருக்கு ஸ்டீராய்டுகள் எதுவும் தேவையில்லை.
அதற்கு பதிலாக உடலுக்குத் தேவையான ஆரோக்கியமான புரதச்சத்தை ஃபிட்னெஸ் பயிற்சியாளர் அல்லது மருத்துவரின் பரிந்துரையோடு எடுத்துக் கொள்ளலாம். போட்டிக்குச் செல்பவராக இருந்தால், தகுந்த நபர்களின் உதவி அவசியம்.
எந்த இலக்கும் இல்லாமல், முறையான வழிகாட்டுதல் இல்லாமல் தாமாகவே இவற்றைப் பயன்படுத்துவது மோசமான உடல்நல பாதிப்புகளை ஏற்படுத்தும்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
Comments
Post a Comment