Doctor Vikatan: முன்பெல்லாம் பெரிய கடைகளில், பணக்காரர்கள் வாங்கும் பழங்களில் ஒன்றாக இருந்தது டிராகன் ஃப்ரூட். இன்று அது சாலையோரக் கடைகளில், தள்ளுவண்டிக் கடைகளில் விற்பனை செய்யப்படுவதைப் பார்க்க முடிகிறது. டிராகன் ஃப்ரூட்டில் என்ன ஸ்பெஷல்... யாரெல்லாம் சாப்பிடலாம்... அதை எப்படிச் சாப்பிட வேண்டும்?
பதில் சொல்கிறார் சென்னையைச் சேர்ந்த ஊட்டச்சத்து ஆலோசகரான ப்ரீத்தா சங்கீத்.
பொதுவாக, நம் உடலில் 'ஃப்ரீ ரேடிக்கல்ஸ்' (Free Radicals) எனப்படும் தீங்கு விளைவிக்கும் மூலக்கூறுகளும், அவற்றை நடுநிலையாக்கும் ஆன்டி ஆக்ஸிடன்ட்ஸ் எனப்படும் மூலக்கூறுகளும் இயற்கையாகவே இருக்கும். இந்த இரண்டும் சரியான சமநிலையில் இருக்கும்போது உடல் ஆரோக்கியமாகச் செயல்படுகிறது. உடலில் ஃப்ரீ ரேடிக்கல்ஸின் அளவு அதிகமாகி, அவற்றை நடுநிலையாக்கத் தேவையான ஆன்டிஆக்ஸிடன்ட்ஸின் அளவு குறைவாக இருக்கும்போது ஏற்படும் நிலையே ஆக்ஸிடேட்டிவ் ஸ்ட்ரெஸ். டிராகன் ஃப்ரூட் ஆன்டிஆக்ஸிடன்ட் நிறைந்த பழம். தவிர, இதற்கு ஆக்ஸிடேட்டிவ் ஸ்ட்ரெஸ்ஸை குறைத்து, நமது உடலை நோய்கள் மற்றும் முதுமையிலிருந்து பாதுகாக்கும் தன்மை உண்டு.
இந்தப் பழத்திற்கு தனித்துவமான அழகான நிறத்தைக் கொடுப்பது பீட்டாலேயின்ஸ் (Betalains) எனப்படும் ஆன்டிஆக்ஸிடன்ட். இது புற்றுநோய் செல்கள் உருவாவதைத் தடுப்பதில் முக்கியப் பங்கு வகிக்கிறது. இந்தப் பழத்திலுள்ள ஃப்ளேவனாய்ட்ஸும் (Flavonoids) நோய்கள் மற்றும் புற்றுநோய்கள் உருவாவதைத் தடுக்கும் பண்புகளைக் கொண்டுள்ளன.
டிராகன் ஃப்ரூட்டில் உள்ள கரோட்டினாய்ட்ஸ் (Carotenoids) கண் பார்வையைப் பாதுகாப்பதுடன், உடலின் செல்களை சேதத்திலிருந்து காக்கும் ஆற்றல் கொண்டவை. டிராகன் ஃப்ரூட் வைட்டமின் சி நிறைந்தது என்பதால் நோய் எதிர்ப்பு சக்தியை வலுப்படுத்தும். தொற்றுநோய்கள் அண்டாமல் காக்கும்.
அதிக நார்ச்சத்து கொண்ட பழம் என்பதால் செரிமானத்தைச் சீராக்கும். உடலில் உள்ள கெட்ட கொழுப்பைக் கரையச் செய்வதால் இதயநோய் வராமல் தடுக்கும். கலோரி குறைவான பழம் என்பதால் டயட்டில் இருப்போருக்கு ஏற்றது
சருமத்தைப் பொலிவாக, இளமையாக வைத்துக்கொள்ளவும் உதவும். அதிக நார்ச்சத்து இருப்பதால், இது ரத்தத்தில் சர்க்கரை உறிஞ்சப்படும் வேகத்தைக் குறைத்து, ரத்தச் சர்க்கரை அளவை கட்டுக்குள் வைக்க உதவுகிறது. நீரிழிவு நோய் உள்ளவர்கள் அளவோடு எடுத்துக்கொள்ளலாம் என அறிவுறுத்தப்படும் சில பழங்களில் டிராகன் ஃப்ரூட்டும் ஒன்று. சர்க்கரை நோய் உள்ளவர்கள் ஒரு நாளைக்கு 100-150 கிராம் வரை இந்தப் பழத்தை எடுத்துக்கொள்ளலாம்.
டிராகன் ஃப்ரூட்டை தோல் நீக்கி அப்படியே மென்று சாப்பிடலாம். பால், தேன் சேர்த்து ஸ்மூதியாக எடுத்துக்கொள்ளலாம். பப்பாளி, மாதுளை, திராட்சை போன்ற பழங்களுடன் சேர்த்து சாலட் போல செய்து சாப்பிடலாம். தயிர், ஊறவைத்த சியா சீட்ஸுடன் சேர்த்துச் சாப்பிடலாம். மில்க் ஷேக்காக குடிக்க விரும்பினால், கொழுப்பு நீக்கப்பட்ட பால் பயன்படுத்தலாம். இனிப்பைத் தவிர்ப்பது சிறந்தது.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
Comments
Post a Comment