Sundar Pichai: "அன்றிலிருந்து என் வாழ்க்கை மாறிவிட்டது!"- கூகுளில் 20 வருடங்கள் கடந்த சுந்தர் பிச்சை

சுந்தர் பிச்சை, தமிழ்நாட்டில் சாதாரணக் குடும்பப் பின்னணியிலிருந்து வந்து இன்று கூகுளின் தலைமைச் செயல் அதிகாரியாக (சிஇஓ) பணியாற்றுபவர்.

சுந்தர் பிச்சை, சென்னை அசோக் நகர் ஜவஹர் வித்யாலயாவிலும், மெட்ராஸ் ஐ.ஐ.டி-யின் வனவாணி பள்ளியிலும் படித்தார். பின், ஐ.ஐ.டி கரக்பூரில் இன்ஜினீயரிங் படித்தார். அமெரிக்காவில் ஸ்டான்ஃபோர்டு பல்கலைக்கழகத்தில் மாஸ்டர்ஸும், வார்டன் ஸ்கூலில் எம்.பி.ஏ-வும் முடித்தவர், மெக்கன்சியில் புராடெக்ட் மேனேஜ்மென்ட் கன்சல்டன்டாக வேலைக்குச் சேர்ந்தார். பின்னர் தனது காதலியும் மனைவியுமான அஞ்சலியின் மென்பொருள் நிறுவனமான Intuit-ல் வணிக இயக்க மேலாளராகத் தன் கரியரைத் தொடர்ந்தார். அதன்பின் Accenture நிறுவனத்தில் மூன்று ஆண்டுகள் பணிபுரிந்தார். 2004க்குப் பிறகுதான் அவருடைய வாழ்க்கையில் திருப்புமுனை ஆரம்பமானது.சுந்தர் பிச்சை, அஞ்சலி

2004-ல் கூகுள் டூல் பார் (Tool bar) புராடெக்ட் மேனேஜராக வேலைக்குச் சேர்ந்தவர், தன்னுடைய திறமையால் தொடர்ச்சியாக அந்நிறுவனத்தின் அடுத்தடுத்த பதவிகளுக்கு முன்னேறினார். 2015-ல் கூகுளின் தலைமை நிர்வாகியாக உயர்ந்தார். 2019-ல் கூகுளின் தாய் நிறுவனமான Alphabet Inc-ன் தலைமை நிர்வாக அதிகாரியானர். இன்று டெக் உலகத்தில் அதிக சம்பளம் வாங்கும் தமிழராகப் பலருக்கும் ஒரு முன்மாதிரியாகத் திகழ்கிறார்.

அவர் கூகுளில் சேர்ந்து இன்றுடன் 20 ஆண்டுகள் நிறைவடைந்துள்ளன. இது குறித்து சுந்தர் பிச்சை தனது இன்ஸ்டாகிராமில், "ஏப்ரல் 26, 2004 அன்றுதான் நான் முதன்முதலில் கூகுள் நிறுவனத்தில் வேலைக்குச் சேர்ந்த நாள். அதிலிருந்து என் வாழ்க்கையே மாறிவிட்டது. எங்கள் நிறுவனத்தில் நிறைய மாற்றங்கள் நிகழ்ந்தன. தொழில்நுட்பத்திலும் நிறைய மாற்றங்கள் நிகழ்ந்துவிட்டன. View this post on Instagram

A post shared by Sundar Pichai (@sundarpichai)


எங்கள் தொழில்நுட்பத்தைப் பயன்படுத்துவோரும் பல மடங்காக அதிகரித்திருக்கின்றனர். என்னுடைய தலைமுடியும் அப்படித்தான் பல மாற்றங்களைக் கண்டது. ஆனால், வேலையின் மீதுள்ள காதலும், ஆர்வமும் இன்னும் மாறவில்லை. உண்மையில் கூகுள் ஒரு அற்புதமான கம்பெனி. 20 வருடங்கள் கடந்துவிட்டன. நான் அதிர்ஷ்டசாலி என்றே நினைக்கிறேன்" என்று பதிவிட்டுள்ளார்.

இது சமூக வலைதளங்களில் வைரலாகி வருகிறது. இதைக் கொண்டாடும் விதமாக அவருக்குப் பலரும் சமூக வலைதளங்களில் வாழ்த்துகள் தெரிவித்து வருகின்றனர்.


http://dlvr.it/T65jJ2