விகடனின் Doubt of Common man பக்கத்தில் பத்ம விருதுகள் யாருக்கு வழங்கப்படுகின்றன? அதற்கு விண்ணப்பிப்பது எப்படி? என வாசகர் ஒருவர் கேட்டிருந்தார். இதுகுறித்து கல்வியாளர் தேனி மு.சுப்பிரமணி விளக்கமளித்திருக்கிறார்.
இந்தியாவின் உயரிய குடியியல் விருதுகளாக பத்ம விருதுகள் இருக்கின்றன. ஒவ்வொரு ஆண்டும் குடியரசு நாளை முன்னிட்டு, இந்திய அரசால் அறிவிக்கப்படும் இவ்விருதுகள் பத்ம விபூசன், பத்ம பூசன், பத்மஸ்ரீ என்று மூன்று பிரிவுகளில் வழங்கப்படுகின்றன.
பத்ம விருதுகள்
இந்திய அரசு 1954 ஆம் ஆண்டில் பாரத ரத்னா மற்றும் பத்ம விபூசன் என்று இரு உயரிய குடியியல் விருதுகளை நிறுவியது. பத்ம விபூசன் விருதானது, முதல் வகுப்பு, இரண்டாம் வகுப்பு, மூன்றாம் வகுப்பு என்று மூன்று பிரிவுகளாக வழங்கப்பட்டது. 1955 ஆம் ஆண்டு ஜனவரி 8 ஆம் நாளில் குடியரசுத் தலைவர் அறிவிப்பின்படி, முதல் வகுப்பு விருது பத்ம விபூசன் என்றும், இரண்டாம் வகுப்பு விருது பத்ம பூசன் என்றும், மூன்றாம் வகுப்பு விருது பத்மஸ்ரீ என்றும் பெயரிடப்பட்டது. பாரத ரத்னா விருது முதன்மை விருதாகவும், விதிவிலக்கான விருதாகவும் இருந்து வருவதால், 2023 ஆம் ஆண்டு வரை 45 விருதுகளே வழங்கப்பட்டிருக்கின்றன. 1978, 1979 மற்றும் 1993 முதல் 1997 வரையிலான ஆண்டுகளில் சில குறுக்கீடுகளைத் தவிர, இவ்விருது பெறுபவர்களின் பெயர்கள் குடியரசு நாளுக்கு முதல் நாள் அல்லது குடியரசு நாளன்று அறிவிக்கப்படுகிறது.
விதிவிலக்கான மற்றும் புகழ்பெற்ற சேவைக்காக பத்ம விபூசன் விருதும், உயர் வரிசையின் சிறப்பான சேவைக்காக பத்ம பூசன் விருதும், சிறப்பான சேவைக்காக பத்மஸ்ரீ விருதும் வழங்கப்படுகிறது. இனம், தொழில், பதவி அல்லது பாலின வேறுபாடு இல்லாத அனைத்து நபர்களும் இந்த விருதுக்குத் தகுதியானவர்கள். இருப்பினும், மருத்துவர்கள் மற்றும் அறிவியியலாளர்களைத் தவிர, பொதுத்துறை நிறுவனங்களில் பணியாற்றுபவர்கள் உள்ளிட்ட அரசு ஊழியர்கள் இந்த விருதுக்குத் தகுதியற்றவர்கள். இந்த விருதானது, தனித்துவமான படைப்புகளை அல்லது செயல்பாடுகளை அங்கீகரிப்பதாக இருக்கிறது. மேலும், அனைத்துச் செயல்பாடுகள் மற்றும் துறைகளில் சிறப்பான, விதிவிலக்கான சாதனைகள் அல்லது சேவைகளுக்காக வழங்கப்படுகிறது. பத்ம விருதுகள் தேர்வு அளவுகோலானது, நீண்ட சேவைகளுக்காக மட்டுமின்றி, சிறப்பு சேவைகளுக்காகவும் வழங்கப்படுகிறது.
வழங்கப்படும் பிரிவுகள்
• கலை (இசை, ஓவியம், சிற்பம், ஒளிப்படம் எடுத்தல், திரைப்படம், அரங்கம் போன்றவை அடங்கும்)
• சமூகப் பணி (சமூக சேவை, தொண்டு சேவை, சமூகத் திட்டங்களில் பங்களிப்பு போன்றவை)
• பொது விவகாரங்கள் (சட்டம், பொது வாழ்க்கை, அரசியல் போன்றவை)
• அறிவியல் மற்றும் பொறியியல் (விண்வெளிப் பொறியியல், அணு அறிவியல், தகவல் தொழில்நுட்பம், அறிவியல் மற்றும் அதன் சார்ந்த பாடங்களில் ஆராய்ச்சி மற்றும் மேம்பாடு போன்றவை)
• வர்த்தகம் மற்றும் தொழில் (வங்கி, பொருளாதார நடவடிக்கைகள், மேலாண்மை, சுற்றுலா, வணிகம் போன்றவற்றை மேம்படுத்துதல்)
• மருத்துவம் (மருத்துவ ஆராய்ச்சி, ஆயுர்வேதம், ஹோமியோபதி, சித்தா, அலோபதி, இயற்கை மருத்துவம் போன்றவற்றில் தனித்துவம் / நிபுணத்துவம் போன்றவை)
• இலக்கியம் மற்றும் கல்வி (பத்திரிகை, கற்பித்தல், புத்தகம் இயற்றுதல், இலக்கியம், கவிதை, கல்வியை மேம்படுத்துதல், எழுத்தறிவை மேம்படுத்துதல், கல்விச் சீர்திருத்தங்கள் போன்றவை)
• குடிமைப்பணி (அரசு ஊழியர்களால் நிர்வாகத்தில் தனிச்சிறப்பு / சிறப்பு போன்றவை)
• விளையாட்டு (பிரபலமான விளையாட்டு, தடகளம், துணிவு, மலையேறுதல், விளையாட்டு ஊக்குவிப்பு, யோகா போன்றவை)
• மற்றவை (மேலே உள்ளடக்கப்படாத துறைகள் மற்றும் இந்தியப் பண்பாட்டின் பரப்புதல், மனித உரிமைகள் பாதுகாப்பு, வனவிலங்கு பாதுகாப்பு / பாதுகாப்பு போன்றவை)
விண்ணப்பிப்பது எப்படி?
• ஒவ்வொரு ஆண்டும் மே 1 ஆம் நாளிலிருந்து செப்டம்பர் 15 வரையிலான காலத்தில் பரிந்துரை விண்ணப்பங்கள் பெறப்படுகின்றன.
• மாநில / ஒன்றியப் பகுதிகளின் அரசு, அமைச்சகங்கள், துறைகள் போன்றவற்றிடமிருந்தும், பாரத ரத்னா, பத்ம விபூசன் விருதாளர்கள் மற்றும் சிறந்த நிறுவனங்களிடமிருந்து பரிந்துரைகள் பெறப்படுகின்றன.
• மத்திய / மாநில அமைச்சர்கள், மாநில முதல்வர்கள், மாநில ஆளுநர்கள், நாடாளுமன்ற உறுப்பினர்கள், தனி நபர்கள், அமைப்புகள் போன்றவர்களிடமிருந்தும் பரிந்துரைகள் பெறப்படுகின்றன.
• தற்போது தனிப்பட்ட நபர்கள் தாங்களாகவும் விண்ணப்பிக்க முடியும்.
விருதாளர்கள் தேர்வு
பத்ம விருதுகளுக்காகப் பெறப்பட்ட அனைத்துப் பரிந்துரைகளும், பத்ம விருதுகள் தேர்வுக் குழுவின் முன் வைக்கப்படுகின்றன. பத்ம விருதுகள் தேர்வுக் குழுவானது, ஒவ்வொரு ஆண்டும் பிரதமரால் அமைச்சரவைச் செயலாளரின் தலைமையில் உள்துறைச் செயலாளர், குடியரசுத் தலைவரின் செயலாளர் மற்றும் நான்கு முதல் ஆறு முதன்மை நபர்களை உறுப்பினர்களாகக் கொண்டு அமைக்கப்படுகிறது. இந்தக் குழுவானது,
• ஒரு தனி நபரின் வாழ்நாள் சாதனையாக இருக்க வேண்டும். அதில் பொதுச் சேவையின் ஒரு அங்கம் இருக்க வேண்டும்.
• சிறப்பு சேவைகளுக்காக இந்த விருது வழங்கப்படுகிறது. நீண்ட சேவைக்காக மட்டும் அல்ல.
• ஒரு குறிப்பிட்ட துறையில் வெறுமனே சிறந்து விளங்கக்கூடாது, ஆனால் அளவுகோல் கூடுதம் மதிப்புடையதாக இருக்க வேண்டும்.
• விருதுகளுக்குத் தேர்ந்தெடுக்கப்பட்ட நபர்கள் விசாரணை மூலம் சரிபார்ப்புக்கு உட்படுத்தப்படுகிறார்கள்.
• விருதுக்குரியவர்களின் குணாதிசயங்கள் மற்றும் முன்னோடிகளை உறுதி செய்யும் நோக்கில் அரசாங்கத்தின் முகமைகள் வழங்கிய பரிந்துரைகளின் அடிப்படையில் பத்ம விருதுகள் வழங்கப்படுகின்றன.
• தேர்வுக் குழுவின் தேர்வுகள் பிரதமர் மற்றும் குடியரசுத் தலைவரின் ஒப்புதலுக்காகச் சமர்ப்பிக்கப்படுகிறது.
• ஒவ்வொரு ஆண்டும் குடியரசு தினத்தை முன்னிட்டு விருதுகள் அறிவிக்கப்படுகின்றன.
விருதுகள்
• பொதுவாக, இந்த விருது மரணத்திற்கு பின் வழங்கப்படுவதில்லை. இருப்பினும், மிகவும் தகுதியான வேளைகளில், மரணத்திற்குப் பின் விருது வழங்குவது குறித்து அரசு பரிசீலிக்கலாம்.
• முந்தைய பத்ம விருது வழங்கப்பட்டதிலிருந்து குறைந்தபட்சம் ஐந்து ஆண்டுகள் கழிந்தால் மட்டுமே, ஒரு நபருக்கு உயர்ந்த பத்ம விருது வழங்க முடியும். இருப்பினும், மிகவும் தகுதியான வேளைகளில், விருதுகள் குழுவால் தளர்வு செய்யலாம்.
• வழக்கமாக இந்த விருதுகள் ஒவ்வொரு ஆண்டும் மார்ச் / ஏப்ரல் மாதங்களில் இந்தியக் குடியரசுத் தலைவரால் வழங்கப்படும். இதில் விருது பெற்றவர்களுக்குக் குடியரசுத் தலைவர் கையொப்பமிட்ட பாராட்டுச் சான்றிதழ் மற்றும் பதக்கம் வழங்கப்படும்.
• விருது பெறுநர்களுக்குப் பதக்கத்தின் ஒரு சிறிய பிரதி வழங்கப்படுகிறது, விருது பெற்றவர்கள் விரும்பினால், அவர்கள் எந்தவொரு சடங்குகள் / அரசு விழாக்கள் போன்றவற்றின் போது அணியலாம்.
• பரிசளிப்பு விழா நடைபெறும் நாளில் விருது பெற்றவர்களின் பெயர்கள் இந்திய அரசிதழில் வெளியிடப்படுகின்றன.
• ஒரு வருடத்தில் வழங்கப்படும் மொத்த விருதுகளின் எண்ணிக்கை (மரணத்திற்குப் பிந்தைய விருதுகள் மற்றும் வெளிநாடு வாழ் இந்தியர்கள் / வெளிநாட்டவர்கள் / ஓசிஐக்கள் தவிர) 120க்கு மேல் இருக்கக் கூடாது.
• விருது என்பது ஒரு தலைப்பைப் பற்றியது அல்ல மேலும் விருது பெற்றவர்களின் பெயருக்குப் பின்னொட்டாகவோ அல்லது முன்னொட்டாகவோப் பயன்படுத்த முடியாது.
• கூடுதல் தகவல்களுக்கு https://ift.tt/xe6zvQt எனும் வலைத்தளத்தைப் பார்வையிடலாம்.
இதேமாதிரி உங்களுக்குத் தோன்றும் கேள்விகள், சந்தேகங்களைக் கீழே பதிவு செய்யுங்க!
Comments
Post a Comment